ROBÓTICA

Os nenos e nenas da aula de 3 anos e as/os  de 6º de Educación Primaria, puxemos en funcionamento os MBOT na maqueta que construimos previamente. Alí tiñamos o robot encargado de poñer en funcionamento a luz do faro; o robot segueliñas, que se desprazaba pola estrada que elaboramos; outros  robots encendían cando detectaban movemento...

Gustounos moito experimentar con eles. E dámoslles as grazas aos nenos e nenas de 6º de EP, que se encargaron de programalos.

PISANDO NÚMEROS

Tamén estivemos repasando os números con este xogo.

UN POUCO DE ROBÓTICA

O martes pasado, dentro do proxecto de robótica no que está participando o centro, algúns dos nenos e nenas de 6º de Educación Primaria baixaron ata a aula de 3 anos. En pequenos grupos debuxaron e pintaron unha estrada que bordea as illas nas que "apareceron" os robots. Nuns días poderemos probar como se desprazan por esa estrada.

 

MEDRANDO

Na aula de 3 anos miramos impacientes todas as mañás para as nosas macetas e esta semana, por fin, puidemos ver os primeiros  xirasois!

Que emoción!

Seguiremos observando a súa evolución! 

PLANTAMOS

Na aula de 3 anos contamos o conto "Aínda nada?". 

"De mañá, ben cedo, o señor Luís cavou un burato enorme na terra. Neste burato enorme o señor Luís deixou caer un granciño cheo de promesas. Despois, o señor Luís volveu tapar o enorme burato e saltou enriba del con todas as súas forzas para pisar a terra. Despois, o señor Luís regou ben a terra coa súa regadeira. O protagonista deste relato sementa algo na terra. Agarda un día tras outro, baixo a expectante mirada dun paxaro, co desexo de ver crecer a flor que nacería dun granciño. Aínda nada?, preguntábase cada mañá, ao ver que da semente non daba agromado ningunha planta, ata que un bo día..."

Despois de estar moi atentos e atentas á historia do señor Luís, puxémonos a plantar.

Cada equipo tiña unha maceta e cada un/unha de nós sementou unha pipa de xirasol. Usamos terra, auga e unha pequena pa. 

Agora queda ter un pouco de paciencia e esperar a que medren!

PRIMAVERA

Na aula de 3 anos levamos unhas semanas traballando a primavera. Unha das actividades que fixemos foi aprender un poema sobre esta estación e decorar estas árbores tan primaverais. 

XORNADAS CULTURAIS: DÍA 3

O venres, na aula de 3 anos, tivemos unha visita moi especial: veu a mamá de Xiana. Contounos o conto "Os Bolechas van ao GAC Costa da Morte". Despois ensinounos a facer cometas! Que divertido! 

E tróuxonos uns agasallos que nos encantaron e que levamos para as nosas casas (unha gorra, pegatinas, un conto...).

Moitas grazas por vir!

  

 

DESPEDIMOS A BRENDA

Hoxe acabou o seu  Practicum Brenda, que estivo con nós durante o mes de febreiro.

Agradecémosche a paciencia e o agarimo co que nos trataches e desexámosche moita sorte!

 

VISITAMOS A BIBLIOTECA

Unha actividade que nos gusta moito facer na aula de 3 anos é ir ata a biblioteca do colexio. Alí aproveitamos para ver libros libremente, respectando sempre as normas da mesma (falamos baixiño, colocamos ben os contos, collemos os libros de un en un...).

Para rematar a sesión estivemos moi atentos ao conto "Caracol e Caracola".

SEGUIMOS CON MONDRIAN

Na aula de 3 anos seguimos co proxecto de Mondrian. Esta semana aprendemos que nos seus cadros gustáballe usar formas xeométricas coma os cadrados e os rectángulos. Nestas fotografías podedes ver como pintamos cos pinceis os rectángulos. Moito nos gusta usar os pinceis e as témperas!

MÁIS MANDADOS DA SARDIÑA

O mércores trouxemos un mandil ou un pano. Aquí nos podedes ver, coa SARDIÑA.

OS MANDADOS DA SARDIÑA

Durante esta semana previa ao Entroido a SARDIÑA estanos dando uns mandados. 

O luns mandou vir ao colexio con bigote; o martes, con algo na cabeza.

Cal será o próximo?

COÑECENDO A MONDRIAN

Na aula de 3 anos, en relación ao Proxecto Documental Integrado que se está a desenvolver no colexio, comezamos  a traballar ao pintor holandés Mondrian. 

Polo momento estivemos falando das súas cores favoritas, da súa nacionalidade e da nosa, do seu traballo...

Aquí nos tedes traballando no proxecto, en concreto coloreando as tarxetas que poñen España e Holanda para despois situalos no mapa.

 

 

LAPBOOK DO OUTONO

Hai  varias semanas, na aula de 3 anos comezamos a facer un  lapbook sobre o outono. Este é o resultado final.

 

 

MÁIS NADAL

Aquí tedes unhas fotos coas postais que fixemos e tamén coa árbore. 

UNHA SEMANA NO NIÑO

Na clase de 3 anos traballamos os días da semana nas rutinas diarias. Partimos do conto "Unha semana no niño" e estes días fixemos a nosa versión, en forma de ovo. Levarémolo antes de Nadal para a casa xunto cos demais traballos do primeiro trimestre. 

Que contentos/as quedamos co resultado!